Lýsing á ferð

Þetta er skemmtileg og fjölbreytt dagsferð um norðurhluta Tenerife sem tekur um átta klukkustundir. Hér blandast saman stórbrotin náttúra, fallegir bæir, saga eyjunnar, kanarísk menning – og auðvitað góður matur og vín.

​

Við leggjum af stað úr bænum um kl. 09:00 og höldum í átt að Teno-fjallgarðinum og í gegnum fallega fjallaþorpið Santiago del Teide. Þaðan liggur leiðin yfir til norðurhluta eyjunnar þar sem við fáum að kynnast allt öðru andliti Tenerife en því sem flestir þekkja frá suðurströndinni.

 

Við komum næst til Icod de los Vinos, sem er eitt þekktasta vínræktarsvæði Tenerife. Hér gefst okkur tækifæri til að sjá hvernig vínrækt hefur verið samofin sögu og menningu svæðisins í margar aldir. Við stoppum einnig við eitt þekktasta náttúruundur Tenerife – hið magnaða Drekatré (Drago Milenario), sem er talið vera yfir 1000 ára gamalt og orðið eitt helsta tákn bæjarins.

​

Þaðan höldum við áfram til Puerto de la Cruz, sem var eitt sinn helsti ferðamannastaður Tenerife og í raun einn af fyrstu alþjóðlegu ferðamannastöðum Kanaríeyjanna. Þar opnaði meðal annars eitt elsta starfandi hótel eyjanna árið 1888 og þangað sótti meðal annarra rithöfundurinn Agatha Christie. Við röltum um fallegar götur gamla bæjarins, njótum stemningarinnar og sjáum gamlar byggingar, bananaplöntur og hina þekktu sundlaugagarða við sjávarsíðuna.

​

Eftir Puerto de la Cruz liggur leiðin áfram til Tacoronte, þar sem við njótum góðs kanarísks hádegisverðar að hætti heimamanna. Með matnum fáum við að smakka vín frá svæðinu og upplifa skemmtilegan og sérstakan stað þar sem yfir 40.000 rauðvínsflöskur prýða veggina.

​

Að lokum höldum við til San Cristóbal de La Laguna, hinnar sögufrægu fyrrverandi höfuðborgar Tenerife. Þar gefst okkur tækifæri til að teygja úr okkur og skoða einstakt borgarskipulag frá 16. öld. La Laguna er á heimsminjaskrá UNESCO og er einn áhugaverðasti sögulegi bær Kanaríeyjanna.

​

Að lokinni heimsókn í La Laguna höldum við aftur til suðurs og endum ferðina á hótelinu ykkar.

​

ATH: Við sækjum og skilum á Hótel í Los Cristianos, Las Americas og Adeje (þó ekki vestur af La Caleta).